? ? ? ? 題記：上一篇文章吾撰寫個是《漫談上海故事之－－緬懷吾個外公倪根生》，迭篇文章自然就要去寫外婆！吾則是迭能樣子唻認為個，對于各位長輩們頂頂好個紀念，勿單單是對長輩要常莊性個念念覅忘，還要通過文字去記錄、銘記長輩們生命旅途個全過程中，各種過往搭點點滴滴。迭些過往搭點點滴滴，覅管是好還是壞，吾伲總能從長輩個身浪學習到一眼么事個，既可以讓吾伲從中多多少少收獲一眼眼收益搭好處，還可以讓吾伲后輩終身去受益匪淺，更可以讓吾伲搭吾伲個后輩們去了解到，吾伲個老祖宗到底是屬于哪能個一類人……

? ? ? ? 實際浪唻講伐，就勒2016年08月06日禮拜六個下半日個辰光，吾曾經撰寫過一篇名字叫做《如風往事之－－漫談梔子花與白蘭花（上海故事）》個文章，文章里向個內容是講上海人搭外婆儕是邪氣歡喜梔子花搭白蘭花迭兩種花朵個。自從吾1998年7月份開始工作以后，每年只要是看到有人勒叫賣梔子花搭白蘭花個辰光，眼扳數會去各買兩朵梔子花搭白蘭花送撥外婆個，伊每趟只要是看到花朵以后，總歸是交關開心勒面孔浪還會樂開花。由于吾從出生一直要到上小學一年級前頭，幾乎是由外公倪根生外婆張榴妹以及大娘舅倪榴發領養大個，搭迭些人個感情可以講是邪氣深厚個，因此講，總感覺到《如風往事之－－漫談梔子花與白蘭花（上海故事）》里向所描寫外婆方面個內容，既是屬于撰寫得覅大夠個，還屬于是有一眼眼個意猶未盡哩，只撥過是撰寫一眼眼而已，就決定單獨去寫一篇搭外婆有關系個文章！

? ? ? ? 外婆張榴妹，伊是勒2008年2月16日禮拜六彈老三，伊享年91虛歲，勒伊天仔真可以去講是一個大晴天，天氣晴朗艷陽高照。

? ? ? ? 勿單單是迭能樣子唻，吾還記得自家勒2012年03月17日禮拜六個夜晚，還去撰寫過一篇名字叫做：《品讀百味人生之－－我以為我是可以的》文章，勒文章當中有一段文字是迭能唻描寫，曰：當外婆張榴妹駕鶴西去的第三天，【備注：外婆張榴妹于2008年2月16日星期六駕鶴西去。】還當我抬頭望著掛在墻上的掛歷，既多想讓日歷和時間永遠都停止不動，還更想讓時間停留在她辭世的前一天哦！……

? ? ? ? 就勒《品讀百味人生之－－我以為我是可以的》文章中，吾還講道：從小到大的我，并不是一點都沒有哭鬧過哩，有時自己不免也是要哭鬧、耍無賴一番的，只是不知道什么才叫做“哭”，流眼淚的機會更是少得可憐，可以說是歷歷可數，還自認為基本上是沒有值得令我感動的、值得去流眼淚的各類人事物情。但是，話又要去說回來，就在那一時刻我卻情不自禁地流下兩行熱淚，而且時間還是哭得很長很傷心的，一直哭到臨出門前，我知道自從她老人家離開我以后，從此在我的世界里面又缺少一位十分慈祥的、始終疼愛我的親人。

? ? ? ? 外婆伊老人家，勒生前個辰光就是屬于一個目不識丁，而且還是一個嘸沒工作個家庭婦女，盡管講是迭能，因為每個號頭要去郵政局幫外公代領工資、報銷等各式各樣個原因，是交關需要一個自家個圖章，外公倪根生曾經就幫助外婆張榴妹去刻過一個木頭（制）個圖章，外婆伊老人家頂多只認得“張榴妹”迭三個字，而且還是要放勒一道個辰光，伊儕會全部去認得個，要是講，儂要是撥迭三個字儕是區分拆開唻，一個又一個讓伊去辨認，伊可以講一個字也是不認得個。嘎么，吾又哪能會曉得迭樁事體個呢？！是由伊老人家告訴吾個。

? ? ? ? 外婆迭一生攏共生育有八個子女，勒子女當中，有五個囡魚搭三個尼子，老大到老四儕是囡魚，老五到老七儕是尼子，老八是家中那末頭囡魚。迭些人個名字分別叫做：老大“倪榴娣”、老尼“倪榴英”、老三“倪金英”、老四“倪榴珍”【備注：伊是吾個老娘。】、老五“倪榴發”、老六“倪林發”搭老七“倪金鳳”，儂勒前頭覅是有講過外婆生育有八個子女嗎？！哪能只去寫有七個人個名字啊？！儕因為勒吾個大娘舅倪榴發上頭，外婆曾經還生過一個男小囡，迭個男小囡生下唻個辰光就是有毛病個，覅曉得到底是啥個原因，迭個小囡是碰也覅能去碰個，只要是輕輕較去觸碰一下小囡個身體，迭個小囡個身體里向就會冒出好像油脂一類個么事，由于生病外加勒掰搿辰光個醫療技術儕覅是邪氣發達個，沒過多久，辰光頂多也就勒一年個光景，就此彈老三。像迭樁事體，除忒外公倪根生曾親口對吾講過以外，還勒某一趟家庭聚會當中，吾還聽外婆對吾個三表姐沈燕也講過個。

? ? ? ? 要是撥外公倪根生搭外婆張榴妹，相互之間拿唻做一個對比搭比較，外公就是屬于一個覅是邪氣講究穿著打扮方面個人，只要人搭衣裳清清爽爽干干凈凈，衣裳嘸沒一丁點個破損之處就好。伊本人是交關喜歡“喫”迭樁事體個，還是屬于一個標標準準個老饕客喫貨，自家也是曉得并懂得啥個食物對伊唻講是好喫、可以去喫個，哪能去喫各種時令小菜，對自家個身心健康儕是頂為有利個。除忒吾勒上述所提及個內容以外，外公勒脾氣秉性方面，搭外婆相比較而言，基本浪就是屬于一個沉默寡言類型個人，只有難板個辰光儕會去講一兩句閑話個，而且還是勒交關熟悉個親朋好友之間，外公儕會搭迭些人去講一兩句閑話個，伊基本浪就是屬于覅哪能啰里八嗦個，要是能覅開口講閑話就覅會去講個。外公講起閑話唻，就是直奔主題簡明扼要點到為止，要是覅是交關熟悉個人，伊是輕易覅肯開口去講閑話個。

? ? ? ? 外婆搭外公相比較唻講伐，就是屬于判若兩人哦，迭兩位長輩就是反過唻個，雖然講外婆個身體搭外公同樣是覅大靈光交關推扳個，又加之自家是生有好幾種毛病個，勒外婆自家個身體里向，像膽囊等各種器官覅是邪氣好，每日還是要搭各種藥罐頭打交道個，要去喫多種藥品哦，諸如就有像“金膽片”之類個藥品，從而就會去造成外婆有邪氣多個菜肴是覅好去喫個，基本浪講是嘸沒一眼眼口福個。

? ? ? ? 還就算是迭能樣子，更即便講今早大娘舅倪榴發已經去燒好外婆能夠去喫個各種菜肴，就算是撥自家屋里向個“鹽缽頭儕是去打翻忒”，等到外婆品嘗過一小口之后，伊本人始終儕會去覺著，今早所烹飪個各種小菜，哪能仍舊是屬于“淡滋刮辣個”，【備注：“淡滋刮辣個”是一句滬語方言詞眼，伊個意思是講淡而無味。】一眼眼味道也是嘸沒個，伊個想法頂好是菜肴個上投再去多撒一大把個鹽哦！

? ? ? ? 吾還記得勒吾個小辰光，就是自家勒就讀小學個辰光，也會時覅時個陪外公外婆一道喫飯個。勒有些辰光，喫過一小口菜肴以后，是覅大愿意去品嘗第尼口個，為啥事體會迭能？！就是但凡是外婆喫個菜肴，儕是齁咸齁咸個，吾還對外婆講過，去喫忒咸個菜肴，對于自家個身體健康是嘸沒絲毫個好處個，還要少喫一眼迭能個菜肴。

? ? ? ? 勒外婆生前個辰光，曾經對伊個子女以及吾伲小輩親口講過迭能個一句閑話，用滬語方言唻講道：“老頭子【備注：外婆稱吾個外公為老頭子。】伊是屬于一個有得喫福個人，伊也會勒喫方面去好好較享受享受，還只要是勒經濟條件允許個情況下頭，伊歡喜喫就讓伊喫好唻，吾本人是一眼眼口福也是嘸沒個，就有交關多個小菜是覅大好去喫個，既然吾覅能夠勒喫個方面去好好較享受一番，吾搭老頭子兩個人，就只好是黃牛角水牛角大家各歸各好唻，關于喫個方面吾本人就覅會得多去考慮一眼啥么事個，吾自家只好勒穿著打扮方面去享受一番，儂又覅是覅曉得，吾本人從年輕辰光開始直到今早仔，一直儕是邪氣歡喜穿著打扮，只撥過，勒老早仔，還勒吾本人年輕個辰光，由于家庭經濟條件方面是交關推扳個，外加還有七八個子女，是覅允許，也是覅能去考慮穿著打扮個問題哦，今早仔經濟條件忒老早仔比較起唻，就要寬裕得交關多，吾就好去考慮穿著打扮個問題！”……

? ? ? ? 上段滬語方言閑話個意思就是勒講：外婆因為身體覅是交關好個原因，有勿勿少少個菜肴是覅能夠去喫個，故而伊老人家是覅去考慮個，伊從年輕個辰光，就愛穿著打扮，因此會去考慮穿著打扮。

? ? ? ? 縱觀外婆伊老人家個迭一生，伊本人滴滴刮刮就是屬于一個邪氣歡喜穿著打扮類型個人，只要是勒自家經濟條件還允許個情況，還只要是勒自家手里向還有一眼眼個寬裕，伊每過一兩年個辰光，就會跑到裁縫店個店鋪里向，去定做一套適合伊本人穿個、勒近搶把市面浪邪氣流行個各種時髦套裝。勿單單是迭能樣子唻，外婆一老人家也是屬于一個交關愛清爽搭愛干凈個老年人哩。勒生前，但凡是所有認得外婆個各位親朋好友、周遭個鄰居以及附近小菜場里向買賣小菜個各位小商小販們，只要是碰到吾伲時，儕會對吾伲迭能唻講道：“儂個老娘（外婆）真是一個愛干凈、邪氣清清爽爽個時髦老太太哦！”……“時髦老太太”就成為伊本人獨有個一個標簽。覅管勒啥個情況下，就算伊自家今早個身體并覅是交關好個，還就算勒生病時，只要是任何一個人碰到并看到伊時，伊撥大家個一種感覺就是－－迭個老太（太）真是一個整整齊齊清清爽爽干干凈凈個時髦老人！

? ? ? ? 還有三條因素同樣也是要去講清爽個，第一條因素就是：覅管外婆是去附近個小菜場買賣各種小菜，還是去屋里家門口倒垃圾，伊本人會勒出門前頭，眼扳數要去梳妝打扮一番個，哪怕是頂頂簡單、頂頂快速個梳妝打扮，伊也是要去弄一下個，也只有儕是去弄好以后，伊本人覺得心滿意足，儕會去買賣小菜、倒垃圾個，要是自家嘸沒去弄好、嘸沒去梳妝打扮過，像迭兩樁事體是覅肯去做個；第尼條因素就是：覅管勒啥個辰光搭情況個下頭，外婆始終是以開心個笑容唻迎接、面對每一位認得伊個人，伊始終儕會去保持著樂觀搭開心個笑容，但凡是碰到并看到過伊老人家個人，伊始終是笑嘻嘻個；第三條因素就是：還有覅少個中老年人，一旦像迭類人跨入到中老年人個行列以后，原先一頭墨墨黑油光锃亮個頭發，就會撥演變成為煞煞白個白頭發，外婆搭其他人是覅大一樣個，等到伊邁入老年人行列以后，頭發依舊是一頭墨墨黑油光锃亮個黑頭發，只有極少數個白頭發，黑頭發要遠遠多于白頭發，頂少起碼也要有80%到90%是屬于黑頭發！

? ? ? ? 外婆伊為啥事體要迭能樣子唻做呢？！伊曾經是迭能唻對吾講個，伊講道：“一個人出門勒外頭，伊勿單單是代表伊本人，伊還代表伊個家庭，從伊個身浪向搭穿著打扮方面去看一看以后，就可以撥別人家曉得，伊拉屋里向到底是哪能樣子個。既覅管伊是長得交關好看個人，還是長得交關難看推扳個人；也覅管伊是搛銅鈿經濟條件邪氣好個人家，還是經濟條件邪氣推扳個人家；穿著打扮起唻干干凈凈清清爽爽，是頂頂基本個，總歸是可以去做到個，迭也是頂頂起碼個一個小小要求，假使講某個人每天撥別人家看上去，始終儕是屬于一個邋里邋遢交關膩心個人，是會撥別人家看大覅起個，就算人家當面覅會得去講啥么事個，勒背后頭眼扳數要撥別人去講忒一頓個！還要去講個就是，一個人假使伊每天儕能保持著干凈搭清爽，伊個精神面貌搭狀態眼扳數是交關良好個，有良好個精神面貌搭狀態以后，整個人隨之而唻就會變得越唻越開心，一個每日（始終）儕能保持著開心樂觀個人，就會變得身心健康，人只要身心健康就能活得長壽一眼眼，健康長壽、壽命活得長一眼眼，迭個又有得啥個覅好呢？！”……

? ? ? ? 上段滬語方言個意思就是講：但凡是始終保持著干凈清爽個人，還但凡是活得邪氣樂觀開朗個人，人也會隨之變得交關長壽個。

? ? ? ? 自從外婆搭外公雙雙儕彈老三以后，老房子就由大娘舅倪榴發居住著，就勒迭一兩年個辰光里，每趟搭家母倪榴珍去探望大娘舅，周圍個鄰居就會對家母唻講道：“儂個老娘走得也是忒早，要是能夠長命百歲，再去多活幾十年就好，吾伲從唻覅看到過，像儂老娘介么介要干凈清爽，又是一個邪氣‘時髦個老太太’，伊自從拆遷搬遷到此地塊以后，伊幾十年唻，從唻就嘸沒搭周遭個鄰居吵過一趟相罵、打過相打，也嘸沒搭周圍鄰居講過一句粗魯個閑話，還要是碰著落雨個天氣里向，看到有鄰居衣裳晾曬勒外頭，就會得去通知一下鄰居，落雨要收衣裳，要是鄰居覅勒屋里向個辰光，伊還會得幫忙收一下衣裳，等到鄰居回到屋里向以后，再去撥伊拉，實在是忒好勒！”……

? ? ? ? 同樣是勒迭個辰光個里向，難板搭家母去外婆生前常莊去買小菜個菜市場買賣小菜，每當有攤販曉得外婆彈老三仔以后，儕異口同聲地講：“吾伲僎曉得老太身體一直是覅大好，還以為老太近搶把身體又覅大靈光，只好待勒屋里向靜養，就覅好出唻買賣小菜，嘸沒想到伊介早就走忒啦，未免也太可惜，要是伊能再去多活幾十年就好勒。覅是吹儂牛逼、吹捧儂老娘，儂個老娘絕對是一個邪氣干凈清爽個時髦老太，而且伊對待任何人儕是邪氣客氣個，伊只要是詢問好菜價鈿，買起小菜是交關爽氣個，吾伲儕愿意撥小菜賣撥儂個老娘。其他老人根本就覅好搭儂個老娘唻比個，覅像有一些老頭老太，年紀看上去搭儂個老娘是差大覅多個，但撥過，就勒其中個一部分人，人是交關邋里邋遢個，伊拉撥人個一種感覺一直（始終）是屬于邋里邋遢個人，而且伊拉買起小菜唻門檻精到九十六，看上去，既好像是要買小菜個，又好像是覅要買小菜個，勿單單要討價還價搞七廿三，有些辰光還要歡喜烏搞百葉結，覅是講這些小菜是覅大好個，就是講伊些小菜是覅大靈光個，根本就覅值迭個菜價鈿哦，搞仔老半日、等到仔半半六十日以后，就開口講，今早仔個小菜實在是邪氣推扳個，吾就覅買儂個小菜，像迭能樣子個人，吾伲就覅愿意撥小菜賣撥伊拉！”……

? ? ? ? 上段滬語方言個意思是講：菜市場里向個各位商販儕講外婆是一個干凈清爽個時髦老太太，買賣各種小菜也交關爽氣個，覅像有些老年人是屬于邋里邋遢類型個人，買賣各種小菜也是摳摳搜搜個。

? ? ? ? 外婆搭外公勒年輕個辰光，絕對是一對標標準準個俊男靚女哦，等到吾看到兩位長輩年輕辰光所拍攝個老照片，【備注：據家母對吾講，迭兩張老照片拍攝個辰光，大約摸就是勒兩位長輩50歲個光景。】像迭兩位長輩個相貌，要是講撥放置到今早仔時，絕對可以講是屬于“網紅”一類個人，還可以讓交關多個人眼睛也為之一亮。實際浪唻講伐，外婆伊本人是邪氣歡喜拍攝各類照片個，由于伊勒年輕個辰光，受制于屋里向個經濟條件，是覅能夠常莊去拍攝各類照片個，也只好等到有重要個事體以后，儕會得難板去拍照片，可以說是千年難板。

? ? ? ? 后首唻，由于國家逐步個開始搞改革開放，屋里向個經濟條件因此也就一天要比一天好得邪氣多個，還由于家父陸吉良勒年輕個辰光，就是交關愛好攝影迭樁事體個緣故，伊勒最初個辰光，則是向別人借照相機拍攝各種照片個，等到吾屋里向也能夠擁有一臺照相機以后，最先擁有個就是一臺傻瓜類型個照相機，覅管是勒爺爺奶奶個屋里，還是勒外公外婆個屋里，還只要是爺爺奶奶外公外婆個屋里有過年過節有大聚餐會個辰光，就會幫雙方老人拍攝好幾張照片個。尤其是每趟勒拍照片個辰光，鏡頭里向個外婆，總是開心得合覅攏嘴個。

? ? ? ? 吾以及搭大吾五歲個親大哥陸明，曾經儕有偷偷摸摸個撥自家個外婆有去偷拍過照片個，只撥過，外婆伊老人家搭伊個一雙眼睛就好像是賊骨頭一樣個，每一趟儕是會撥伊察覺到，也儕是以失敗而告終個。既覅管勒啥個辰光個里向；也覅管外婆個年齡到底有多少；伊反應始終是交關靈敏個，堅決覅允許吾伲去偷拍伊，伊講勒拍攝照片個前頭，事先就要撥伊自家個衣裳搭頭發弄整齊干凈以后，儕可以去拍攝照片個，實際浪外婆始終是一個邪氣愛干凈愛清爽個人，就勒拍攝照片個前頭，伊絕對是覅再需要去梳妝打扮眼啥個，可是伊本人每一趟勒拍攝照片個辰光，始終儕是覅哪能放心個，總歸還要去弄得更好，會勒鏡子前頭照一照，一直要等到伊自家感覺到交關滿意為止。

? ? ? ? 要是去談論脾氣秉性方面，相比之下而言，外婆就要比外公外向得許多哦，伊老人家只要是勒身體良好個狀態之下，更愿意去搭大家多講一眼眼個閑話，外婆更愿意搭任何一個認得伊個人，去談談山海經（聊天）。只撥過，每趟勒搭大家談論個辰光，伊始終儕會有迭能個一條做人原則搭言行準則個，伊曾告訴吾講，談論歸談論，伊既永遠覅會去談論某些個人或某戶人家里向個某些家長里短，也覅會去講某某人覅哪能好、覅大靈光個地方，總歸去講人家好個地方、自家所曉得個各類人事物情……伊曾經還對吾唻講道：“任何一個人，多多少少儕有錯誤搭缺點個，覅要老是盯牢人家錯誤搭缺點個地方覅放，去講人家錯誤搭缺點的地方，迭能個一種做法，既是覅好個，也是覅對個，要多去看看人家好個地方，多去講講人家好個地方！”……

? ? ? ? 當辰光走到今早仔，吾儕剛剛發覺并去意識到，外婆盡管是一個目不識丁嘸沒啥個工作個家庭婦女，伊要么覅去開口講各種閑話，一旦伊要是開口、講起各種閑話唻個辰光，絕對是一套又一套個，吾伲還覅一定能講得過伊個，伊可以講得儂嘸沒一眼辦法好去反駁伊，就勒所講個閑話當中，就有覅少個閑話，還包含著邪氣豐富個哲理性個。每當外婆交關開心個辰光，伊還會去找人尋開心，還會搭對方去開一些邪氣高級個玩笑，去講一些笑話撥每個人聽，一些低級無趣味個閑話，從唻嘸沒聽伊去說過一句，伊就“好像是一個幽默大師”。

? ? ? ? 就讓吾列舉一兩個例子，唻加以說明外婆“像幽默大師”。

? ? ? ? 第一個例子就是：當吾個親侄子陸昊年齡勒一歲半到兩歲左右個辰光，侄子就會開始講一眼簡單個短語搭短句。每趟仔家母帶上吾以及吾個侄子去探望外婆個辰光，外婆看到陸昊以后就會變得交關開心，還會去尋伊開心個，一邊笑著一邊問侄子：“喂喂喂，小朋友儂唻啦，歡迎儂唻堂頭白相相哦！喂喂喂儂是幾號啊，儂是六號（陸昊）哦，儂一定要記記牢啊，覅管啥人唻問問儂，儂只要去回答伊拉，吾是六號（陸昊）就好，千萬覅要去忘記忒啊！”……只因為侄子個名字“陸昊”，勒滬語方言閑話當中，搭“六號”個讀音是一式勢樣個，幾乎是嘸沒啥個區別個，所以外婆儕會尋侄子開心、“戲耍”侄子。

? ? ? ? 第尼個例子就是：就自從掰搿辰光開始起，還勒相當長個一段辰光里向，只要是吾每個號頭獨自一個人去探望外公搭外婆個辰光，伊老人家“眼扳數要唻尋吾個開心”個，伊只要是一看到本人以后，就會率先開口用滬語方言唻講迭能個閑話，曰：“哦呦喂，‘高橋爺叔’儂唻白相啦、‘高橋爺叔’儂今早仔又唻堂頭白相相啦！”……

? ? ? ? 勒起先頭個辰光，當吾聽到外婆勒講迭句閑話個辰光，由于自家就是屬于有一眼眼愚笨個緣故，還因為吾搭同輩個親眷做比較，就是頂覅聰明個一個人，總會去覺得外婆所講個閑話是覅大好個，心里向還有一眼眼個覅大開心哩，等到外婆詢問吾并加以解釋說明以后，此時個吾就儕是釋然覅再去介懷。伊就詢問道：“儂老底子是居住勒啥個地方啊？！”吾就對外婆回答道：“吾老底子是居住勒高橋古鎮浪個。”伊又繼續唻詢問道：“儂侄子要叫儂一聲啥個呢？！”吾接下去回答道：“伊自然要叫吾一聲爺叔咯！”外婆就解釋道：“因為儂本人老底子是居住勒古鎮高橋上頭個，儂侄子要喊儂一聲爺叔，所以吾就要叫儂一聲‘高橋爺叔’嘛，吾之所以要迭能樣子去做，既嘸沒去講錯忒，也嘸沒做錯，儂講吾講得到底是對覅對啊？！”……

? ? ? ? 上段滬語方言個意思就是講：因為吾頂早是居住勒浦東最東面高橋古鎮浪個，吾個侄子要叫吾一聲“爺叔”，【備注：上海人一律撥那些叔叔一輩個人叫做“爺叔”。】所以外婆就叫吾一聲高橋爺叔。

? ? ? ? 起先頭吾聽到“高橋爺叔”迭組詞眼，之所以心里向會覅大開心，只因吾曉得迭組詞眼個唻歷。雖講“高橋爺叔”迭組詞眼是由中華民國時期上海灘個大亨杜月笙叫出名個，聞名上海個。只撥過，勒杜月笙未曾出生前，勒最初個辰光，迭組詞眼，只流行于原唻個川沙縣地區，高橋鎮原唻是屬于川沙縣個管轄，而且勒最初個辰光，迭組詞眼個含義是邪氣覅好個。據講勒老里八早個高橋古鎮，辰光頂頂起碼也要勒杜月笙出生前頭，勒高橋鎮上有一些專門從事“坑蒙拐騙”行當個人，大家對于從事迭種行當個人，勿單單是恨之入骨，還對迭一類人起一個覅好個外號就是叫“高橋爺叔”，只要是大家聽到有人叫某個人是“高橋爺叔”，自然就會讓周遭人群變得警惕起唻！……

? ? ? ? 當文章撰寫到迭個辰光，已經是快要接近文末哦，吾勒末腳還要再去列舉一個有關于外婆方面個例子，唻講講外婆是哪能個人。

? ? ? ? 勒辣末，吾還要去講講迭能個一樁事體，迭樁事體就是－－關于外婆搭外公迭兩位老人家奉獻愛心個故事，盡管講外婆搭外公個經濟條件并覅是屬于交關好、邪氣寬裕個，還盡管講像迭能個一樁小事體，對于其他人看唻，根本就是屬于微不足道不值一提個小事體，儂拿出唻講伊做啥事體？！只是吾卻覅是迭能唻認為個，吾卻認為絕對是值得吾伲小一輩好好較唻學習學習個，絕對是言傳身教個好教材！

? ? ? ? 吾個外公搭外婆就是屬于邪氣擁有愛心個人，比方講：就勒兩位老人家所居住個小區里向，就有一戶人家祖孫三代共處一室，原先迭戶人家是居住勒二室一廳個房子里向，迭戶人家也是屬于交關普通個一戶人家，因此講迭戶人家個經濟條件并覅是邪氣好，因為孫子檢查身體得血癌，只為能讓自家個孫子去看好迭個毛病，就撥原先個房子置換成一室一廳，還是居住勒同一個小區里向，就算是迭能樣子吧，既覺得銅鈿還是覅夠用，還覺得嘸沒銅鈿以后，就難以治好孫子個病。小區里向個鄰居曉得迭樁事體以后，大家互幫互助紛紛慷慨解囊捐款，盡管講外公搭外婆自家個經濟條件也覅是屬于邪氣好，也同樣是屬于一戶普通個人家，但是等到迭兩位老人家曉得迭樁事體以后，也從自家個牙縫當中省下人民幣50塊，捐款撥迭戶人家，而且還是由外婆親自送到迭戶人家屋里向去個。覅僅迭能，像迭戶人家也同樣是曉得外婆是一個嘸沒啥個經濟收入個家庭婦女，依靠個就是外公個退休金過日腳個，一邊流淚，一邊覅肯接受，要還撥外婆，外婆堅決覅同意，講無論如何也要收下50塊，迭是代表吾伲屋里向個一眼小心意，還開玩笑個對迭戶人家唻講，儂是覅是嫌隙吾伲銅鈿撥得邪氣少個緣故，所以覅肯去接受啊！……迭戶人家嘸沒辦法，只好接受50塊……

? ? ? ? 覅管用多少文字去記錄外婆，覅免會有掛一漏萬個地方，盡管是迭能樣子，吾還是要以頂平淡搭樸素個文字，去描繪吾所曉得個外婆，同樣也是謹以此文，唻緬懷已彈老三11年之久個外婆張榴妹！

? ? ? 【備注：①：文章為作者原創；②：所有個外公外婆搭大娘舅圖片儕是作者自家翻拍個；③：各種水果類圖片儕是來唻源于網絡上頭：④：萬分感謝原創圖片。】

? ? ? ? 杜老倌俠客居（陸偉）寫于2019年09月04日禮拜三夜里向