? ? ? ? 對于“知趣”迭個詞語唻講伐，伊就是屬于一句上海方言閑話，迭個詞語，伊最主要個意思搭含義，就是勒拉講：覅管是身處勒拉啥個社會階層里向個人群搭個人，伊本人勒拉做人個辰光，頂頂起碼也要去懂得一眼眼最最基本個、上海人所擁有個、各色各樣個人情世故，自家一定要去曉得并弄清爽迭能一樁事體，既覅管是阿里一種類型搭脾氣性格個人，也覅管是勒拉啥個辰光搭場合下頭，儕都應該去弄弄清爽，勒拉迭個辰光里向，啥個閑話么是屬于自家好去講出唻個，啥個事體么又是屬于自家現在就好去做忒個，是千萬覅好去弄錯忒哦，一旦畀自家弄錯忒、弄反嘞以后，眼扳數要畀大家貽笑大方個！總而言之歸納起唻講伐，迭個就是－－做人言行一定要恰如其分適合伊個身份，要是弄覅好就會得讓人覺著迭個人就是屬于邪氣錯氣個。
? ? ? ? 實際浪向，“知趣”迭個詞語覅是現在儕開始有、儕開始流行起唻個，古已有之，頂頂早是出現勒拉吾伲國家歷史浪向個宋朝辰光。宋朝辰光有一位詞人叫做趙德莊趙彥端，伊撰寫有《永遇樂·陪程金溪躍馬用其韻》一詞，勒拉其中伊就講道：“笑看相，風林露草，古唻有誰知趣。”還比方講：中國四大古典文學名著中個《西游記》，勒拉第九十三回就講道：“你這黑子不知趣。”同樣是中國四大古典文學名著個《紅樓夢》，勒拉第二十七回也有一段關于知趣方面個閑話，也講道：“鳳姐打量了一回，見他生得干凈俏麗，說話知趣。”
? ? ? ? 勒拉老一輩個上海人看唻，人與人之間打交道、交往是在所難免個，阿是覅可缺少個，所以邪氣看重打交道交往個人，是覅是一個“知趣個人”。假使講伊本人是“一個知趣個人”，就搭伊繼續、長期打交道交往下去，辰光一長久而久之，以后還有可能成為交關要好個好朋友哩；假使講伊“覅是一個知趣個人”，一趟兩趟也就算嘞，等到第三趟，要是伊本人老是屢教覅肯去更改改正個閑話，嘎么打交道軋朋友就只好到此為止嘞，再阿么啥個下趟仔嘞，下躺仔再阿覅愿意去搭迭種人碰碰頭、打交道軋一個朋友嘞，就算偶爾勒拉馬路浪向碰到嘞迭種人，阿會裝作嘸認得伊，甚至于還會得去壓壓較避避開！
? ? ? ? 吾本人是迭能樣子唻理解、認得并去認為“知趣”迭樁事體個，迭個是屬于邪氣重要個一種好品質哦，覅管是身處勒拉阿里一個社會階層里向個人群搭個人，每個人勒拉生命旅途個全過程當中，勒拉自家個人生道路上，也同樣是屬于覅可缺少個一種好品質哦！勒拉老一輩個上海人看唻，絕對是屬于覅可缺少個一種好品質，對于老一輩個上海人唻講伐，伊拉是邪氣看重迭種品質個，所以嘸管勒拉啥個辰光、是啥個人，做人一定要去懂得“知趣”，更要去“學會知趣”，老一輩個上海人是頂歡喜搭“邪氣知趣個人”軋一個朋友。要是伊本人“覅是一個知趣個人”，覅僅從開口到閉口，覅會得去搭迭種人講一句閑話，更覅大會得搭迭種類型個人，有得絲毫個往唻與交往。
? ? ? ? 勒拉一般情況下頭唻講伐，只要是屬于一些覅（大）知趣個人，對于絕大多數個人唻講伐，基本浪向儕是屬于“拎（大）覅清爽個人”，也是屬于“覅（大）識相個人”，還是屬于“看（大）覅出山水”一類個人，像迭種類型個人，陪伴著辰光覅斷個前進搭推移，久而久之，伊肯定會得倒（大）霉、跌一個（大）跟頭、喫（大）屈哦……實際浪向，凡是交關知趣個人，儕是看得出山水個人，“知趣”搭“山水”勒拉某些情況下頭，還是可以去劃一個等號個。儂去看，凡是一些覅是邪氣知趣個人，勒拉一般情況下頭，儕是看大覅出山水個人，要是有人搭伊指出伊本人覅是一個知趣個人，有些人依舊還會得當做補藥去喫喫，雖說是迭能樣子，伊本人依舊會得我行我素依然如故！
? ? ? ? 還有個就是，老一輩個上海人，對付那些“覅（大）知趣個人”“拎（大）覅清爽”“覅（大）識相”“看（大）覅出山水”個一類人，頂頂好個一種辦法，就是尋到一個好機會，輕者，就請伊喫喫毛栗子，重者，就要請伊去喫一頓“辣貨醬”哦，所以勒拉上海個方言俗語當中，就有一句閑話叫做：“覅識相，要喫辣貨醬！”
? ? ? ? 另外，勒拉老一輩個上海人還邪氣歡喜去講迭能一句閑話哦，講道：“覅識人頭，喫煞苦頭！有借有還，再借覅難！”……迭句閑話伊個意思同樣是勒拉指：覅管是啥個人，做人一定要知趣、是一個知趣個人，凡是覅（大）知趣個人，伊肯定嘸好日腳可以去過個！
? ? ? ? 勒拉通常情況下頭唻講，凡是那些“覅（大）知趣個人”，往往儕都是屬于“拎（大）覅清爽”“覅（大）識相”“看（大）覅出山水”一類個人群搭個人哦，迭種人一旦是弄到后末唻以后，是用覅著多去講眼啥個么事個，絕對嘸會得有一個好結果個。覅僅僅是迭能樣子，勒拉俗常生活當中、勒拉吾伲個人生旅途中，多多少少就會得碰到迭能樣子個人。有得交交關關多個人，伊自家還覅一定曉得明白伊是迭能樣子個人唻，一旦等到伊自家發覺以后，好像情況搭苗頭有一眼覅大對頭個閑話，迭個辰光已經是晚忒嘞，絕對是唻覅及個！
? ? ? ? 勒拉人與人之間打交道、交往搭軋男女朋友個過程當中，凡是屬于覅（大）知趣個一類人群搭個人，往往是覅大容易受到大家個歡迎個，大家覅僅對伊本人個態度會得像對待瘟神一樣，對伊阿是敬而遠之壓壓較避避開，就算實在是嘸得啥個辦法去避避開個閑話，也只好是表面客客氣氣去應付一下、打一聲招呼僅此而已，覅（大）會得去拖泥帶水多啰唆些啥個閑話哦。伊做人已做到嘞迭種地步，儂講伊還有得啥個人味道伐？！就勒拉迭種狀況下頭，覅但是屬于覅（大）知趣個人所擁有個悲劇，還要是伊生魂靈頭醒悟過唻，多多少少伊自家阿會覺得做人嘸啥個味道好去講個，也可以講是缺少人味道嘞！
? ? ? ? 實際浪向，既覅管是屬于身處勒拉啥個社會階層里向個人群搭個人；也覅管伊本人是從事啥個行當個；亦覅管伊本人是屬于啥個脾氣性格個人；更覅管勒拉啥個情況搭場合下頭；對于“做人”迭樁事體唻講伐，就要做一個“邪氣知趣個人”。嘎么，有得啥個好辦法可以去操作個法，還是有得個，迭個一種好辦法也是屬于交關簡單方便個辦法，就是－－多做事體少去講各種閑話。有一句閑話叫做：“言多必失！”閑話講得交關少，總歸是覅錯哦！如果一定要去講各種閑話，要去發表一眼眼意見搭建議，只要做到簡明扼要點到為止就好。
? ? ? ? 另外吾還想去講個閑話，迭個就是－－自家勒拉做人個辰光，除忒多做事體、少講閑話、少去談山海經嘎訕胡以外，個人還要盡自家最大個努力，去做到盡量少去麻煩人家，少去搭人家糾纏覅清爽就對嘞，只要能夠去做到個閑話，伊就是屬于一個邪氣知趣個人哦！
? ? ? ? 有一些人，勒拉人與人之間打交道、交往搭軋朋友個全過程當中，自我感覺覅要邪氣良好哦，總認為搭大家個感情絕對是好得唻嘸啥個閑話好去講個，簡直就是屬于（好像）穿一條褲子個親兄弟姐妹哩，還好像自家是一個大領導一樣，就可以自以為是個去指手畫腳，要求大家只要迭能樣子去做，伊能樣子去做，絕對是覅可以覅好覅唻三個，凡是有迭種想法個人，儂講伊是屬于覅（大）知趣個人伐？！勒拉某些情況下頭、勒拉剛剛開始個辰光，大家有可能礙于是朋友、礙于面子，覅好搭伊發啥個脾氣、翻啥個毛搶，但是勒拉內心深處已經覅（大）愉快嘞，多多少少有得一眼眼想忒伊拗斷斷交念頭嘞，假使伊還覅曉得進退、覅會得去改改脾氣性格，結果當然好覅到啥地方去，朋友會得一個又一個搭伊拗斷，以后伊再阿么朋友軋不著好朋友嘞……
? ? ? ? 覅但是迭能樣子哦，勒拉人與人之間打交道、交往搭軋朋友個全過程當中，總歸會有得一些覅（大）知趣個人出現勒拉吾伲面前啊，還會自認為自家“絕對是一個萬人迷”，更會受到“萬眾矚目”通通圍牢伊轉哦，伊勒拉心里向會得想，亦會受到大家邪氣熱烈個歡迎，像迭種人，弄到嘞后末唻，經常是弄得唻一眼眼落場水啊是嘸得個，還往往讓人勒拉背后譏笑不已，更會得畀人家去看成一個笑話。
? ? ? ? 只要儂搭吾是一個有心人，還之所以會變成功迭能樣子，更之所以會經常性出現覅（大）知趣個人群搭個人，吾是迭能樣子唻理解、認得并去認為個，頂頂主要個原因，也無非有得如下三種情況。
? ? ? ? 第一種情況就是：搭伊本人所受到個教育程度、個人所擁有個經歷搭閱歷、自家個綜合素質搭綜合能力等方面……綜合上述吾所講個各種因素，全面去加以分析了解以后，絕對是屬于休戚相關個。
? ? ? ? 第尼種情況就是：搭伊本人覅（大）曉得，啥個辰光么自家應該大踏步個向前去前進，又是啥個辰光么是自家好向后去撤退嘞，伊本人既是屬于分覅清爽是非搭場合個，伊本人也是覅（大）會得考慮啥個后果個，只會得先開口去講出唻，勒拉啥個場合下頭么，哪能去講各種好閑話、去做好各種事體，啥個閑話是吾自家好去講出唻個，啥個閑話又是自家絕對覅好去講出唻個，絕對是有著莫大個關系！
? ? ? ? 第三種情況就是：勒拉人與人之間打交道、交往搭軋朋友個全過程當中，還搭伊本人覅大肯、覅歡喜講一些真心閑話，同樣也是有得一定個關系個。要么覅講一句閑話，一旦講起各種閑話唻，幾乎是嘸得一句實話搭好閑話個，畀任何一個人儕覺著，伊總是云里霧里云山霧罩覅夠接地氣，好像要到處去防備任何一個人似的。一旦真個碰到嘞迭種類型個人，對付迭種人，阿么的啥好個辦法，吾伲只能去采用行動唻表明，吾伲只好對儂是敬而遠之避避開，忒儂拗斷斷交！
? ? ? ? 儂去看，縱觀人類個歷史以后，就會得發覺迭能一樁事體唻哦，勒拉人類個歷史浪向、勒拉古今中外各類人事物情當中，同樣是有得邪氣知趣個人搭覅大知趣個人哦，吾就嘗試著去列舉倆個例子唻分別去加以說明吧。勒拉吾伲國家個歷史浪向，“邪氣知趣個人”還是要數春秋末期著名個政治家、軍事家、經濟學家搭道家學者范蠡嘞，當越國國王勾踐復國成功以后，范蠡就一眼看出勾踐迭個人是屬于“可以去共患難”，“而絕對覅能共富貴個人”，于是乎，范蠡就邪氣知趣個掛冠而去，遠遠較逃離嘞越國，覅再搭勾踐一道共事，后末唻就一門心思去做起各類生意經，成為著名大款陶朱公哦；同時代搭范蠡一道共事個文種，相比之下唻講，伊就是一個邪氣覅大知趣個人哦，還要夢想著搭勾踐一道去共享榮華富貴，嘸料想到，嘸過多久就畀勾踐賜死嘞，伊成為歷史浪向狡兔死走狗烹交關好個一個例子啊。
? ? ? ? 由上述吾所列舉出唻個例子就可以去看到，“知趣”實際浪向就是一種“修養”搭“禮貌”，與此同時凡是那些“邪氣知趣個人”，既能夠去好好較保護好自家哦，還能夠去避免各類覅必要個尷尬，更可以去保持自家應該有個一種尊嚴，覅至于受到胯下之辱搭畀人家個羞辱哦。畀過要去“做一個知趣個人”，也覅是交關容易個一樁事體哦，伊需要交交關關多個人生閱歷、人生技巧搭各類人生常識。
? ? ? ? 吾伲國家個古人也覅是去講過迭能一句老古閑話嘛，講道：“識時務者為俊杰也！”吾始終認為，但凡是屬于一個邪氣知趣個人，與此同時伊本人必然是屬于一個“交關有得眼色”“邪氣識相一類人”“邪氣會得識各種人頭”，是會得去看“各種山水”個人。
? ? ? ? 迭種人覅管勒拉啥個情況下頭，既覅（大）會得勉勉強強去做各類事體，也覅（大）會得去一意孤行個，“劍走偏鋒”搭“厚顏無恥”也覅（大）會得是伊本人做人個行為搭準則哦，像迭種人做每一樁事體個前頭，絕對會得去前思后想考慮得邪氣清爽，啥個事體搭閑話是吾本人好去做個，啥個事體搭閑話又是本人覅能去做個，如果是覅能去做個閑話，就會得去想盡一切辦法搭方法，讓自家去全身而退，像迭種類型個人，伊拉個智商搭情商，要比一般個人高出覅是一眼兩眼哦，而是就要高出交關多個，審時度勢就是伊拉個拿手好戲哩。
? ? ? ? 通過吾上述所寫個文字，還讓吾曉得嘞，任何一樁人事物情實際浪向儕是相通個，與此同時又可以相互去借鑒，拿唻為吾所用個！既覅管是啥個人，也覅管伊是做啥個行當搭營生個，更覅管勒拉啥個情況下頭，到處要去講究“知趣”迭個詞語，人人儕是離覅開“知趣”迭個詞語！還比方去講，要是吾伲目前是身處勒拉情場上頭，軋一個異性朋友，或許勒拉某些辰光里向，蠻卿卿我我你儂我儂個，畀過，辰光一長久而久之，只要對方橫考慮豎考慮并認為，倆個人之間因為收入、工作、感情搭情感等綜合因素，已經覅大適合再繼續交往下去軋一個朋友，而且已經明確發出嘞一個暗示，要是伊本人是一個知趣搭聰明個人，就會邪氣知趣個選擇退出，好好較搭對方去講一聲好聚好散再會嘞，希望儂以后能尋找到比吾還要好個對象，就覅應該再去死纏爛打糾纏著覅肯去放手嘞。假使講伊本人覅是一個知趣個人，還有一眼眼拎（大）覅清爽，存有一絲僥幸心理，始終搭對方糾纏覅放，等到對方去講出更加絕情個閑話，做出絕情事體唻，弄得嘞兩敗俱傷、鬧個魚死網破，覅但會得自取其辱，還會讓自家傷受得更加深！
? ? ? ? 文章寫到此地塊，吾自家同樣要去對照上述所撰寫個內容，去好好較想一想，自家有些辰光絕對也是一個“半吊子”人哦，勒拉有些辰光吾是屬于邪氣知趣個人，勒拉有些辰光吾又覅是屬于一個邪氣知趣個人，所以講，從今朝仔開始做起，從今往后，一定要去改正覅（大）知趣迭個邪氣覅大好個壞習慣，要盡力爭取去做一個知趣個人！
? ? ? 【備注：①：文章為作者原創；②：前十八種老上海風情街圖片由遠親老伯伯黃錦榮提供個；后面七張老上海風情街圖片儕是來源于網絡上頭，圖片搭文字很有可能是不相匹配的；③：萬分感謝原創圖片哦！】
? ? ? ? 杜老倌俠客居（陸偉）寫于2013年10月19日禮拜六下半日
