? 又到暑假嘞。而家啲學生哥放假唔系去旅游，就系去夏令營，或者去少年宮學嘢，總之就四處奔波，節目多多。同我哋細個嗰陣相比，直情系蚊同牛比——冇得比。不過，我諗起有一個樂園，我哋細個放暑假嗰陣成日都想去，今時今日已經消失咗，所以而家啲細路都唔知道有呢個去處。呢個咁值得回味嘅樂園，就系街邊嘅公仔書鋪嘞。

? 上世紀六十年代初，廣州嘅大街小巷有好多提供租睇公仔書（連環畫） 嘅鋪頭，呢啲“公仔書鋪”其實豆腐潤咁細嘅地方，擺放幾張長條矮凳仔，周圍掛滿公仔書封面嘅裱紙，雖然又嘈又迫，卻系當時細路好中意嘅地方，求家長摞到一、兩分錢跑去公仔書鋪嘅心情，肯定開心過而家啲細路揸住十幾蚊去打機。你睇啱邊本，話畀書鋪嘅老伯聽，佢就會揾出嚟，畀你座喺矮凳仔睇 。50頁以下，半分錢一本（畀一分錢找番一張蓋住公仔書鋪名字印章嘅紙片）；99頁以下，一分錢睇一本；100頁以上，2分錢睇一本。（租返屋企睇，每日租金雙計。新書唔畀租返屋企睇）。而且一般不限時。每到放寒暑假，直情座無虛席爆嗮棚。一啲熱門書如《三國演義》.《楊家將》往往早就畀人捷足先登租咗睇緊，想睇就要老伯報名登記等候。而喺等候期間，有時可以“搭睇”——就系坐喺睇緊書嘅細路旁邊斜住睇。

? 有舊同學講起當年公仔書鋪事，佢話佢哋街口嗰間系唔畀搭睇嘅，人手一本，各睇各書，無書者就是冇畀錢偷走入嚟嘅，一經發現，馬上驅逐。我話冇錯，我哋巷尾嗰間原先可以，后來因為鬼馬仔鉆空子，少賺了錢，后來都唔畀嘞。其改變過程，本人重有幸經歷。

? 小學四年級暑假嘅一個下晝，我正喺榕樹蔭下閑坐，同學奀仔、細強走過嚟，問我去不去租書睇，我話我今日冇錢。佢哋自豪咁話我哋有！原來奀仔幫屋企擔水（從街頭公共自來水站），細強幫阿嫲掹白頭發，都摞到一分錢獎勵。佢哋話以前你關照我哋，今次請你去搭睇。我喜出望外跟佢哋去租書鋪。奀仔租咗本《趙子龍血戰長坂坡》，，細強遞畀我一分錢，叫我故意又租同一本。書鋪老伯戴住個老花眼鏡，慢吞吞揾嚟揾去揾唔到，話畀人租咗，歸還先有，你坐低等下啦。我就偷偷將錢還畀細強，然后坐喺奀仔旁邊搭睇。細強用一分錢租咗《空城計》，亦坐喺我身旁。我以飛快嘅速度左睇右看。奀仔同細強睇完書后又神不知鬼不覺咁互相調換。兩個鐘后，我哋心滿意足離座。兩分錢換嚟三個人睇咗兩本厚書，我重睇多一次（不過左擰右扭頸有啲酸），奀仔同細強重儲備咗一份我嘅搭睇人情。我自然多謝夾盛惠。我哋重諗住，下次有機會再嚟個照版煮碗。點知，第二日書鋪老伯就出咗張告示唔畀搭睇嘞，告示內容至今重清楚記得：搭睇可憐，換書可恥，一律禁止，違者罰紙（半分錢）！

?如今已無影無蹤嘅公仔書鋪，當年畀咗我哋無限嘅快樂。本來好有人情味嘅書鋪老伯，我哋啲頑童卻揾人笨帶畀佢麻煩，而家諗番轉頭，重有幾分內疚。