? 喺日常生活中，經常聽到一啲盞鬼趣致嘅白話歇后語。比如喺打麻雀嘅場合，一家輸咗唔少，就會話我已經系“水瓜打狗———唔見咗一大截”啦。另一家輸得重多嘅亦埋怨：今日唔系打牌日，我直情系“二叔公蒔田———聽殃(等秧)”。而贏家往往識得安慰一下：牌未打完，你重可以“二叔公割禾———睇下截”啰。
? ?喺收集廣州話歇后語嘅過程中，覺得其特點有三：一系地方特色。如“沙灣燈籠———何苦(府)”，就系出自番禺沙灣，由于當地人多姓何，掛出大門嘅燈籠自然就寫上“何”字。又如“潮州二胡———自己顧自己”、“三水佬睇走馬燈———陸續有嚟”，以及“鼎湖上素———好齋”都系各自地方獨有風采。二系民俗特色。如“疍家雞見水———有得睇，冇得飲”，“疍家婆打仔———唔憂你飛上灘”，都反映咗水上人家生活，喺船上，養嘅雞梗系見到河水都飲唔到，而細路仔畀阿媽打亦無處可逃。又比如“賣鯇魚尾———搭嘴”、“賣魚佬———有聲(腥)氣”、“阿均賣魚頭———好噏唔噏”等等呢幾句都系同賣魚行當有關。三系民間人物特色。開頭提到嘅二叔公重有唔少歇后語，如“二叔公炒冷飯———冇啲新嘢”、“二叔公唱咸水歌———冇曬譜”。其他人物亦有：“阿蘭嫁阿瑞———類斗類”、“鐵木真打仔———大汗耷細汗”、“陸榮廷睇相———唔衰摞黎衰”、“陳景華派煙———送終”。
? ?白話歇后語除咗呢三個特點之外，仲有一個值得留意嘅就系好多都有出處或者講系有典故。好似頭先陸榮廷睇相呢句，就系曾任廣東都督嘅陸榮廷，一次心血來潮，衣衫襤褸入算命館睇相，想試探一下睇相先生嘅眼力。點知畀相士“小神仙”一語道破天機，話佢“唔衰摞嚟衰”，意謂佢本系個顯赫大官，緣何扮成窮人模樣，不衰而偏要裝成衰樣。后來大家就將好地地嘅事情搞到衰壞境地謂之“陸榮廷睇相”。而陳景華系民國時期廣東警察廳廳長，每到死刑犯人行刑前，會畀佢一支香煙。因此坊間就有“陳景華派煙———送終”或“陳景華派煙———唔慌好嘢”一說。仲有一句歇后語典故有歷史價值，系“陳濟棠占卜———以為有機”。1936年，得到廣西軍閥李宗仁、白崇禧慫恿，南天王陳濟棠準備公開反蔣，請高人占卜，得四個字：機不可失。于是乎心雄膽壯，打出反蔣大旗。但系兵尚未動，陳濟棠賴以自豪嘅廣東空軍畀蔣介石收買，全部飛機飛到南京；跟住陸軍亦相繼離散，南天王變成孤家寡人，只好夾起細軟走佬。呢個時候，陳濟棠才悟到，原來“機不可失”嘅意思，唔系時機而系飛機唔可失。呢句歇后語后來就用嚟比喻同一個字，如果理解成唔同意思，就系“打邊爐同打屎忽———兩碼事”。
