作為一件狂熱嘅奶茶愛好者，我幾乎日日都會飲返杯。但係就算冇乳糖不耐，飲得奶多終會屙，呢啲時候，我就會轉飲茶頂嚇鋪癮。

我好少飲水，又嘛嘛哋咖啡，所以茶嘅消耗量好大，不知不覺屋企就變咗茶水間，未計花草茶都有成十幾二十種唔同嘅茶。不過老老竇竇，飲開其實得嗰幾隻，如果冇乜茶癮，呢幾隻應該都夠應付日常。

以上佳麗排名不分左右

平時飲得最多嘅呢幾隻茶，分別有紅茶、ほうじ茶（中文叫乜我真係唔知）、煎茶（綠茶）、烏龍茶。

紅茶代表係「TWININGS川寧」嘅愛爾蘭早餐茶，官方話濃度係medium，但係自問重口如我都覺得濃度應該算heavy，不過濃就啱數啦，紅茶就係要夠濃先好飲?嘛。同牌子嘅英式早餐茶標註都係濃度medium，但係我飲落就覺得唔夠喉，通常沖第三轉水就開始冇乜味。愛爾蘭早餐茶就唔同啦，5g茶葉沖一杯，夠你由早餐飲到午餐……（咪玩）

如果有Chinese Breakfast版本，可能係……豆漿

另一位紅茶佳麗同樣來自「TWININGS川寧」，不過已經飲曬所以得返「遺照」一張。呢隻紐西蘭早餐茶好似淨係喺紐西蘭地區（maybe澳州都有）發售，幾個月前親愛嘅歌莉亞bb（我家姐）喺紐西蘭返嚟，帶咗一喼特產畀我，其中包括呢盒濃度同前面愛爾蘭早餐茶有得揮嘅紐西蘭早餐茶。除咗夠濃之外，佢重勝在有種花草香，唔知mix咗乜入去呢？

ほうじ茶嘅代表係實冇走雞嘅「伊藤園」。以前我好少飲ほうじ茶，因為齋飲味道似麥茶又唔多夠香，直到mix咗烏龍茶嚟飲，先至打開我新世界嘅大門。尤其是當你食到飽飽滯滯嗰陣，飲返兩啖ほうじ茶mix烏龍，直頭覺得新陳代謝都快啲！

煎茶代表都係「伊藤園」（call me腦殘粉），煎茶雖然都係綠茶嘅一種，但係飲落同中式綠茶口感相差甚遠。通常日料店提供嘅唔係玄米茶就係煎茶（如果你見到茶杯底有層粉，就實係煎茶啦）。間唔中飲得發酵茶多，需要一股清流滋潤嚇嘅時候，我就會飲呢種。

最後輪到「賣飛佛」烏龍茶啦！烏龍茶梗係要飲臺灣烏龍啦！所有茶類入面，我最鍾意就係烏龍茶。尤其是凍頂烏龍，嗰種清香甘甜簡直無法用筆墨形容。以前去臺灣我會買多幾盒看門口，不過今時今日馬雲爸爸可以滿足曬你不同願望，唔駛囤貨啦，上淘寶就得啦。講開又講，以前我一直以為「鐵觀音」係綠茶，點知其實佢係烏龍茶嚟?！鬼叫去親飲茶，問啲茶樓姐姐都話「冇烏龍茶！要普洱定鐵觀音？」咩……睇嚟有誤會嘅唔止我一個。

總之飲茶又好飲奶茶又好，炎炎夏日，飲多兩啖水就更好。